Gitan-aw sa Department of Environment and Natural Resources ang pakigtambayayong sa pribadong sektor isip usa sa dugayng panahon nga solusyon aron matubag ang problema sa polusyon sa mga drainage system ug waterways.
Gipadayag sa ahensya ang paggamit sa Extended Producer Responsibility o EPR ug Philippine Ecosystem and Natural Capital Accounting System o PENCAS isip kabahin sa maong pamaagi.
Ubos sa Extended Producer Responsibility Act of 2022, obligado ang dagkong kompanya nga moangkon og responsibilidad sa tibuok life cycle sa ilang plastic waste, lakip na ang pag-recover sa ilang mga plastic packaging waste.
Sumala ni Environment Secretary Juan Miguel Cuna, kaniadto ang local government units ang nag-unang responsable sa solid waste management, apan karon gipalig-on na ang partisipasyon sa pribadong sektor aron sila mismo makatabang sa pagdumala ug pag-atubang sa plastic waste.
Samtang, ang PENCAS nagmugna og sistema aron matino ang tinuod nga bili sa natural resources ug mga ecosystem, lakip ang environmental cost sa kadaot nga resulta sa polusyon ug dili husto nga pagdumala sa basura.
Gibutyag usab sa DENR nga migamit kini og 196 ka trash traps alang sa pagkolekta sa mga naglutaw nga basura, samtang gipalihok ang kapin 1,500 ka estero rangers ug rover warriors aron magmonitor ug manglimpyo sa mga kanal ug sapa sa Metro Manila.
Matud sa DENR, pinaagi sa panagtinabangay sa gobyerno, mga negosyo, local government units ug publiko, tumong nilang dili lang balik-balikon ang pagpanglimpyo sa basura, kundili mapugngan ang dili husto nga pagdumala niini aron dili na kini mahimong balik-balik nga hulga sa mga waterways, komunidad ug kinaiyahan.
