GENSAN- Gipasa na sa third and final reading sa Sangguniang Panlungsod sa General Santos City ang ordinansya nga naghatag og tax relief alang sa mga negosyante ug property owners nga naapektuhan sa linog.
Matud ni Councilor Franklin Gacal, ang maong ordinansya nagtumong sa pagwagtang sa mga “surcharge”,” interest ug penalties sa delinquent” nga buhis sa negosyo ug “real property taxes”, ilabi na sa mga property nga naapektuhan o nadaot tungod sa linog.
Dako usab kini nga tabang alang sa mga negosyante nga grabeng naapektuhan sa linog, lakip na kadtong mga negosyo nga wala na makapadayon sa operasyon tungod sa pagkadaot o pagkaguba sa ilang mga establisemento.
Gipahayag ni Gacal nga ang maong ordinansya gipangayo usab sa Chamber of Commerce, ug gikombinar sa komitiba ang ilang proposed ordinance ug ang proposal nga gikan sa Executive Department aron makahimo og usa ka win-win nga solusyon alang sa mga apektadong negosyante ug property owners.
Matud pa ni Gacal, positibo ang reaksyon sa mga benepisyaryo tungod kay nakita nila ang paningkamot sa lokal nga gobyerno sa pagtabang sa mga katawhan nga naapektuhan sa linog.
Si Gacal mismo miangkon nga siya ang miduso sa maong ordinansya isip kabahin sa mga lakang aron mapagaan ang pinansyal nga kabug-at sa mga naapektuhan sa linog.
