GENSAN- Gipahayag ni Gensan Lone District Rep. Shirlyn Bañas-Nograles ang iyang kabalaka sa pagkunhod sa pondo alang sa iyang distrito sa 2027, ilabina sa panginahanglan nga ma-rehabilitate ang mga estrukturang nadaot sa 7.8 magnitude nga linog.
Sumala ni Bañas, mokabat lamang sa kapin o kulang P500 milyon ang pondo nga gigahin alang sa mga proyekto sa distrito sa 2027, kon itandi sa gibana-banang P1.7 bilyon sa iyang miaging GAA.
Gihangyo sa kongresista nga tagdon ang kapin P200 milyon nga girekomendar base sa imbentaryo sa DPWH sa mga proyekto nga nanginahanglan og rehabilitasyon, ilabi na ang mga estrukturang nadaot tungod sa linog ug mga sunod-sunod nga aftershock.
Gipasalig ni DPWH Secretary Vince Dizon nga dili na hulaton ang 2027 aron sugdan ang pag-ayo sa mga nadaot nga pasilidad.
Matod ni Dizon, gamiton ang NRM Fund ug Quick Response Fund sa DPWH alang sa mga estrukturang na-yellow tag ug na-red tag.
Una nang tutukan ang pag-ayo ug pag-ilis sa mga school building ug health facilities nga grabeng naapektuhan sa linog.
