Gikuwestiyon ni Sen. Francis Pangilinan si kanhi Office of the Vice President Special Disbursing Officer Gina Acosta bahin sa pagbalhin sa confidential funds ngadto kang Col. Raymund Lachica.
Sa pagpangutana sa senador, iyang gipadayag nga bisan pa og na-release o na-disburse na ang pondo, adunay gihapon responsibilidad ang disbursing officer nga masiguro nga husto ug subay sa proseso ang paggamit niini.
Matod pa ni Acosta nga human niya i-release ang kwarta ngadto kang Lachica, dili na niya kontrolado ang maong pondo. Apan, miingon siya nga nagsumite si Lachica og utilization report nga nagpakita matod pa kung giunsa paggamit ang pondo.
Gipasabot ni Acosta nga misalig siya sa maong report tungod kay si Lachica mao ang gitudlo ni Vice President Sara Duterte isip security officer nga nagdumala sa confidential operations ug mao usab ang commanding officer.
Samtang, dili usab klaro kang Acosta kung adunay bahin sa gipagawas nga pondo nga sa ulahi naadto kang Mary Grace Piattos tungod kay wala matod siya didto sa ground.
Sa uban pang mga gasto, migawas sa pagdungog nga P122 milyon ang alang sa mga tambal samtang P112 milyon ang alang sa mga suplay para sa tree planting ug Lakbay-Aral.
Dili usab matino ni Acosta kung pila gyud ang aktuwal nga gibayad alang sa mga tambal ug suplay nga gigamit sa Lakbay-Aral ug tree planting activities nga giapil sa confidential funds.
Matod ni Acosta, dili na niya mahinumdoman ang eksaktong kantidad tungod sa kadaghan sa acknowledgment receipts nga iyang nadawat ug giproseso.
