Gihangyo ni Senate President Win Gatchalian ang Department of Education o DepEd nga paspason ang pagpuno sa mga bag-ong posisyon alang sa mga estudyanteng adunay kapansanan, aron mas mapalapad ang ilang access sa gikinahanglang suporta ug serbisyo sa eskwelahan.
Matod ni Gatchalian, gi-aprobahan na sa Department of Budget and Management o DBM ang 133 ka bag-ong plantilla positions, lakip ang mga posisyon alang sa Senior Education Program Specialists, Education Program Specialist IIs, Physical Therapist IIs ug Occupational Therapist IIs.
Gipasiugda sa Senate President nga importante nga mapun-an dayon ang maong mga posisyon tungod kay kabahin kini sa pagpatuman sa DBM, o Instituting a Policy of Inclusion and Services for Learners with Disabilities in Support of Inclusive Education Act, nga nagtumong sa pagsiguro nga adunay access sa edukasyon ug may kalabotan nga serbisyo ang mga learners with disabilities.
Gimando usab sa maong balaod sa DepEd ang paghimo og multi-year roadmap alang sa pagpatuman niini. Lakip sa mga tumong sa maong roadmap ang pagtukod sa Inclusive Learning Resource Centers o ILRCs ug paghimo sa gikinahanglang plantilla positions.
Ang mga bag-ong posisyon nga gi-aprobahan sa DBM kabahin sa lakang aron makadugang og mga personnel nga adunay igong kahanas sa pagtubag sa partikular nga panginahanglan sa mga learners with disabilities.
Lakip niini ang mga physical therapist ug occupational therapist nga makahatag og espesyal nga suporta sa mga estudyante, ingon man ang mga education specialist nga motabang sa pagpatuman sa mga programa alang sa inclusive education.
Apan, matod ni Gatchalian, dako pa gihapon ang panginahanglan alang sa mga eksperto sa inclusive education.
