Nakaangkon og duha ka medalya ang usa ka miyembro sa Philippine National Police o PNP sa iyang pag-apil sa Muay Thai competition sa Thailand.
Si Police Corporal Jonard E. Apa-an sa PNP Anti-Cybercrime Group nakadaog og silver medal sa 51-kilogram Muay Thai Combat Category.
Samtang bronze medal usab ang iyang nauli sa Wai Kru Singles event sa Siamyout Global Heritage Muay Thai Series 2026 nga gipahigayon sa Samut Songkhram, Thailand, gikan Agosto 10 hangtod 12.
Gitimbaya usab ni Chief PNP Police General Jose Melencio C. Nartatez Jr. si Apa-an tungod sa iyang pagrepresentar sa PNP ug sa nasod sa international competition.
Gipasalig sa PNP chief nga suportahan nila ang mga kapulisan nga adunay mga talagsaong talento sa sports ug sa ubang mga natad.
