Misaka pa sa 7.4 million ka indibidwal, o bugti sa 2.1 million ka pamilya, ang naapektuhan sa mga kalamidad nga miigo sa nasud.
Base sa pinakabag-ong datos sa National Disaster Risk Reduction and Management Council, natala ang mga apektadong populasyon sa Ilocos Region, Cagayan Valley, Central Luzon, Calabarzon, Bicol Region, Western Visayas, Zamboanga Peninsula, Cordillera Administrative Region, National Capital Region ug MIMAROPA.
Nagpabilin sa 29 ang ihap sa mga namatay tungod sa pagpanalasa sa mga bagyong Luis, Maymay ug habagat.
Sa mga natala nga namatay, 15 ang narekober sa Benguet, 4 sa Rizal ug Batangas, 2 sa Caloocan, samtang tig-usa sa La Union, Quezon, Oriental Mindoro ug Negros Occidental.
Aduna pa gihapoy tulo ka tawo nga gikatahong nawala, samtang 19 ang nasamdan.
Sa pagkakaron, nagpabilin gihapon sa mga evacuation center ang 40,600 ka indibidwal, o bugti sa 11,900 ka pamilya.
Misaka usab sa gibanabanang 2,300 ka mga balay ang nadaot tungod sa pagpanalasa sa mga kalamidad.
Sa pagkakaron, mokabat na sa 89 ka lugar sa tibuok nasud ang gideklara ubos sa state of calamity tungod sa epekto sa mga bagyo ug habagat.
