Migasto na og kapin P8 billion ang Commission on Elections sa padayong pagpangandam niini alang sa umaabot nga Barangay ug Sangguniang Kabataan Elections 2026.
Ang maong eleksyon gikatakdang ipahigayon sa unang semana sa Nobyembre 2026, apan adunay gisugyot nga pagpalangan pag-usab niini.
Sa pakighinabi sa Bombo Radyo kang Comelec Chair George Garcia, iyang gibutyag nga dakong bahin sa pondo sa komisyon ang nagasto na sa pagpangandam sa mga kagamitan alang sa eleksyon sama sa pag-imprenta sa mga balota.
Sa pagkakaron, adunay nahibiling P11 bilyon nga pondo nga gigahin sa komisyon alang sa “honoraria” sa mga magtutudlo nga magsilbi sa eleksyon, pondo alang sa ilang training, ug alang sa deployment sa mga kagamitan sa ulahi.
Gikatakdang paminawon sa Senado sa mosunod nga mga semana ang gisugyot nga pagpalangan sa BSKE 2026.
Matud ni Garcia, motambong siya sa maong pagdungog aron ipahayag ug ipakita ang kaandam sa komisyon alang sa eleksyon.
Sumala kang Chairman Garcia, samtang wala pa gikansela ang eleksyon, ipadayon sa komisyon ang ilang pagpangandam, lakip na ang paghimo og mga contingency measures.
Nahitabo kini tungod kay panahon sa mga pagbaha ang Nobyembre, busa gusto sa komisyon nga adunay andam nga contingency plans kung adunay mga pagbaha nga mahitabo sa wala pa ug sa mismong adlaw sa eleksyon.
Base sa rekord sa Comelec, kapin 70 million ka mga Pilipino ang kwalipikadong makabotar sa BSKE 2026.
