GENSAN- Gipasalig sa General Santos City Police Office ang hugot nga seguridad ang ipatuman atol sa pagsaulog sa Tuna Festival 2026, samtang dili usab kini makaapekto sa regular nga operasyon sa kapulisan sa mga barangay sa dakbayan.
Matud ni General Santos City Police Office Officer-In-Charge P/Col. Ariel B. Acala, magdepende ang gidaghanon sa mga police personnel nga ideploy sa gidak-on ug lokasyon sa mga lugar nga pagahimuan sa mga kalihokan.
Iyang gipunting nga sa City Hall Drive lamang ang lugar nga gamiton sa mga programa , busa mas sayon kini alang sa kapulisan nga masiguro ug makontrol ang mga entrada ug exit.
Tungod niini, dili matod pa nga mahimong dakong hagit ang seguridad atol sa maong kalihokan.
Gipasiguro usab niya nga dili maapektuhan ang regular nga police deployment ug operasyon sa nagkadaiyang barangay tungod kay adunay igo nga personnel ang kapulisan.
Apan kung adunay kakulang sa pwersa, andam ang General Santos City Police Office nga mangayo og augmentation gikan sa regional headquarters.
