Paigtingon sa Philippine National Police (PNP) ang mga panuntunan alang sa seguridad sa mga armas nga gi-isyu sa mga pulis, subay sa pamusil nga nahitabo sulod sa Ateneo de Zamboanga University niadtong Martes, Agosto 18.
Matud sa PNP, gimandoan na ni PNP chief PGen. Jose Melencio Nartatez Jr. ang mga commander nga pahinumdoman ang mga pulis sa hustong pag-atiman ug pagdumala sa ilang mga armas kung off duty ug anaa sa ilang panimalay. Dili angay nga ibutang o biyaan ang mga armas sa mga lugar nga sayon maabot sa mga bata.
Gipahayag usab sa hepe sa nasudnong kapulisan nga kinahanglan iapil ang mga pahimangno bahin sa firearm accountability sa unit briefings ug formations aron mapataas ang kahibalo sa mga pulis ug malikayan ang mga insidente sama sa dili hustong pagtipig sa armas.
Gipasiugda sa PNP chief nga ang gamay nga pagpasagad mahimong mosangpot sa pagkawala sa kinabuhi. May kalabotan niini, miingon ang heneral nga gisuportahan nila ang mas higpit nga accountability sa mga tag-iya sa armas ug iyang gipasiugda nga “non-negotiable” ang responsableng pagtipig sa mga armas.
Gipagawas sa PNP chief ang maong direktiba human sa makalilisang nga pagpamusil nga nahitabo sulod mismo sa usa ka eskwelahan sa Zamboanga, diin ang mga armas nga gigamit sa estudyanteng suspek gikan sa iyang amahan nga usa ka Customs Police chief.
Base sa inisyal nga imbestigasyon, gikuha sa bata ang mga armas gikan sa sakyanan sa iyang amahan, diin gitago ang mga armas.
