Usa ka linog nga may gikusgon nga 6.7 ang miigo sa habagatang Peru niadtong Huwebes (lokal nga oras), sumala sa United States Geological Survey (USGS).
Ang sentro sa linog natala 38 kilometro amihanan-kasadpan sa Upahuacho, sa probinsya sa Parinacochas sa rehiyon sa Ayacucho, ug adunay giladmon nga mga 66 kilometro.
Ang pagtay-og nabati sa daghang bahin sa habagatang Peru, lakip ang Ica ug Arequipa.
Samtang, ang Geophysical Institute of Peru (IGP) nagtaho og mas taas nga magnitude nga 7.2, nga natala ang giladmon nga 108 kilometro.
Sa inisyal nga report, walay natala nga halapad nga kadaot. Ang mga awtoridad nagpadayon sa pag-assess sa mga lugar nga naapektuhan sa linog.
Ang Peruvian Navy nagtaho usab nga walay hulga sa tsunami.
Ang Peru kabahin usab sa Pacific Ring of Fire, mao nga ang nasud kanunay nga makasinati og kusog nga mga linog.
