GENSAN- Gipahugtan sa General Santos City Police Office ang seguridad sa mga eskwelahan sa syudad aron mapugngan ang posibleng insidente sa active shooting o pagpamusil sulod sa mga eskwelahan.
Matud ni PCol. Ariel B. Acala, Officer in Charge sa GSCPO, gipahugtan ang security deployment sa mga eskwelahan pinaagi sa koordinasyon sa mga school authorities, security guards, barangay officials, barangay tanods, stakeholders ug force multipliers.
Sumala ni Acala, seryoso nilang gihatagan og pagtagad ang posibilidad nga adunay mahitabo nga insidente sa mga eskwelahan, busa ipadayon nila ang hugot nga deployment sa kapulisan aron maseguro ang kaluwasan sa mga estudyante ug mga personnel sa mga eskwelahan.
Dugang pa ni Acala importante ang pagpahigayon og mga symposium alang sa mga estudyante ug PTA meetings aron mahatagan og hustong pahimangno ug giya ang mga ginikanan bahin sa seguridad sa ilang mga anak.
Gidasig ang mga ginikanan nga kon adunay armas sa ilang panimalay, kinahanglan kining ibutang sa luwas nga lugar ug dili ma-access sa mga bata.
Matud ni Acala, importante kini aron malikayan ang posibilidad nga maimpluwensyahan ang mga kabatan-onan ngadto sa mga binuhatan nga mahimong makahatag og peligro sulod sa mga eskwelahan.
