GENSAN- Nagpahinumdom ang General Santos City Police Office sa mga estudyante, magtutudlo ug mga trabahante sa eskwelahan sa hustong mga lakang nga angay buhaton kon adunay mahitabo nga insidente sa active shooter o pagpamusil sa usa ka tulunghaan.
Sumala sa kapulisan, ang unang lakang mao ang pagdagan o pag-ikyas kon adunay luwas nga agianan gawas sa lugar.
Gipasidan-an ang publiko nga dili na maglangan aron mangolekta sa mga personal nga gamit ug unahon ang kaugalingong kaluwasan.
Kon dili na posible ang pag-ikyas, gitambagan ang mga tawo nga magtago sa luwas nga lugar, i-lock o babagan ang pultahan, magpabiling hilom ug likayan ang mga pultahan ug bintana aron dili dali makit-an sa mamusil.
Gipahinungod usab sa kapulisan ang importansya sa pagreport sa insidente pinaagi sa pagkontak sa mga emergency responder ug paghatag sa tukmang lokasyon ug importanteng impormasyon kalabot sa nahitabo.
Ang pahinumdom kabahin sa panawagan sa kapulisan sa dakbayan sa publiko nga magpabiling alerto ug mahibalo sa hustong mga lakang aron malikayan ang dugang nga peligro panahon sa emerhensiya.
