GENSAN- Gipalig-on sa General Santos City Police Office o GSCPO ang police presence sa nagkadaiyang eskwelahan sa siyudad isip kabahin sa ilang lakang aron mapanalipdan ang mga estudyante ug mga magtutudlo.
Gipangulohan ni PLtCol Aldrin M. Gonzales, Deputy City Director for Administration sa GSCPO, ang pagbisita sa pipila ka mga eskwelahan aron susihon ang kahimtang sa seguridad sulod ug palibot sa mga school campus.
Atol sa maong pagbisita, gisusi sa kapulisan ang mga security measures sa matag eskwelahan ug nakigkoordinar sa mga school administrator ug personnel aron matubag ang posibleng mga concern nga mahimong makaapekto sa kaluwasan sa mga estudyante ug magtutudlo.
Tumong sa GSCPO nga masiguro ang luwas ug malinawon nga learning environment ug malikayan ang mga hulga, kapintasan ug uban pang insidente sulod sa mga eskwelahan.
Matud sa kapulisan, ipadayon nila ang regular nga police presence ug koordinasyon uban sa school community isip kabahin sa ilang paningkamot nga mapalig-on ang seguridad sa mga eskwelahan sa General Santos City.
