Gimando ni Pangulong Ferdinand Marcos Jr. sa mga law enforcement agency sa Zamboanga City ang usa ka lawom nga imbestigasyon may kalabotan sa makalilisang nga insidente sa pagpamusil karong buntag sa Ateneo de Zamboanga University aron matino ang mga kakulangon ug mahibal-an kung unsa pa ang mahimong buhaton aron malikayan ang pagbalik sa susamang trahedya.
Nagpaabot usab og pahasubo si Pangulong Marcos sa mga pamilya ug sa tibuok komunidad sa Ateneo de Zamboanga nga naapektuhan sa maong trahedya.
Gipadayag ni Usec. Claire Castro nga ang mga eskwelahan kinahanglan mahimong luwas nga lugar diin ang mga kabatan-onan makakat-on, motubo ug makapangandoy nga walay kahadlok.
Bisan pa man nga pribadong eskwelahan ang Ateneo de Zamboanga, matud ni Castro nga sakop sa maong direktiba ang tanang eskwelahan, pribado man o pampubliko.
Gawas sa seguridad, dugang usab ni Castro ang importante nga papel sa mga ginikanan ug magtutudlo sa paggiya sa mga kabatan-onan.
Matud niya, kinahanglan mahimong maayong ehemplo ang mga magtutudlo ug eskwelahan sa paggiya sa maayong pamatasan ug mga prinsipyo sa mga estudyante.
Nagpasidaan usab si Castro nga dili angay nga i-tolerate ang mga hulga batok sa kinabuhi, ilabina sa social media.
Matud ni Castro, dili angay nga himuong normal o dawaton ang mga pahayag nga nag-awhag sa kapintasan o pagpatay.
Sumala pa niya nga responsibilidad sa tanan—gobyerno, eskwelahan, mga ginikanan ug komunidad—ang paghimo og mas luwas nga palibot alang sa mga kabatan-onan ug ang pagpugong sa mga insidente nga mahimong mosangpot sa laing trahedya.
