Pormal nang gipaila ni Municipal Mayor Lilibeth “Ybing” J. Salarda ang bag-ong Officer-in-Charge o OIC Chief of Police sa Alabel Municipal Police Station atol sa Traditional Monday Flag Raising Ceremony kagahapon, Agosto 17, 2026, atubangan sa Alabel New Government Center sa Poblacion, Alabel, Sarangani Province.
Gipaila ni Mayor Salarda si PLTCOL Canieso W. Golwingon isip bag-ong OIC Chief of Police sa Alabel MPS nga nipuli sa pagpangulo sa estasyon human sa pagpanaw niadtong Agosto 7, 2026 sa kanhing hepe sa kapulisan nga si PLTCOL Benjie O. Ancheta.
Atol sa seremonya, mitambong ang mga personahe sa Alabel MPS ubos sa pagpangulo ni PLTCOL Golwingon isip pagpamatuod sa ilang suporta sa mga programa ug kalihokan sa Lokal nga Panggamhanan sa Alabel.
Gipasiugda usab sa maong kalihokan ang importansya sa lig-on nga koordinasyon tali sa lokal nga panggamhanan ug kapulisan aron mapalig-on ang pagpatuman sa mga programa alang sa kalinaw, kahapsay ug kaluwasan sa komunidad.
Samtang, mipasalig ang Alabel MPS nga magpadayon sa matinud-anon ug propesyonal nga pag-alagad sa katawhan ug pakigtambayayong sa LGU Alabel ubos sa pagpangulo ni Mayor Salarda alang sa pagmintinar sa peace and order sa tibuok lungsod.
