GENSAN- Gipaklaro ni General Santos City Mayor Lorelie Pacquiao nga adunay pipila ka barangay nga wala pa hingpit nga nahatagan sa 25 kilos nga bugas nga ayuda gikan sa Local Government Unit o LGU.
Matud sa mayor, samtang wala pa moabot ang bug-os nga supply nga i-apod-apod sa tanang household, adunay pipila ka barangay kapitan nga mihimo og kaugalingong inisyatiba aron matabangan ang mga residente nga wala pa makadawat sa bugas.
Apan gipatin-aw niya nga dili obligado ang mga kapitan nga buhaton kini. Lakip sa iyang gihisgutan ang Barangay Fatima ug Barangay Labangal nga mihimo og inisyatiba tungod sa kadaghan sa ilang populasyon.
Nasayod usab si Mayor Pacquiao nga adunay ubang barangay kapitan nga migamit sa ilang kaugalingong pondo aron makahatag og bugas sa mga household nga wala pa makadawat sa LGU rice assistance.
Dugang sa mayor, gibase sa ilang initial planning ang pag-andam sa 25 kilos nga bugas alang sa target nga mokabat sa 180,000 ka residente. Apan tungod sa proseso sa pagkuha ug pag-apod-apod sa supply, wala pa dayon mahatagan ang tanang household sa matag barangay.
Gipadayag ni Pacquiao nga wala niya gimandoan ang mga barangay kapitan nga mogamit sa ilang pondo alang sa maong ayuda, ug ang ilang paghatag og bugas usa lamang ka boluntaryong inisyatiba. Gipasalig usab sa mayor nga padayon ang LGU sa pag-apod-apod sa 25 kilos nga bugas hangtod mahatagan ang mga household nga wala pa makadawat niini.
