Giakusahan ni Defense Secretary Gilberto Teodoro Jr. ang China sa paggamit og disinformation aron ilikay ang pangunang isyu kalabot sa pagdakop sa mga Chinese nationals sa Pilipinas ug kapin 100 ka Pilipino sa China.
Sa pahayag ni Teodoro karong Sabado, Agosto 15, iyang giingon nga gilikayan sa Chinese Foreign Ministry ang importanteng pangutana kung nalambigit ba sa ilegal nga mga kalihokan ang mga Chinese nationals nga gidakop sa Pilipinas. Matud niya, “ang simple at malinaw na sagot ay oo.”
Lakip sa mga alegasyon batok sa mga suspek ang paggamit o pagproseso sa substandard ug radioactive-contaminated steel, paglabay og hugaw nga tubig ngadto sa mga suba, ug pagpagawas og makahilong aso. Sumala kang Teodoro, gisuportahan kini sa “dili ikalimod nga ebidensya” nga nakolekta pinaagi sa mga search warrant nga gipagawas sa mga korte sa Pilipinas.
Giakusahan usab niya ang pipila ka opisyal sa Chinese Embassy sa pagpanghilabot sa local law enforcement ug pagpanghulga og panimalos batok sa mga Pilipino. Kini human mipahibalo ang China nga nagpahigayon kini og operasyon batok sa kapin 100 ka Pilipino tungod sa giingong ilegal nga pagtrabaho ug pagpuyo didto.
Apan gipadayag ni Teodoro nga ang mga Chinese nationals nga gidakop sa Pilipinas dili lamang ordinaryong mga trabahante, kondili mga nag-unang nagpadagan matod pa sa mga ilegal nga negosyo. Giingon usab niya nga daw mas nakapokus ang China sa visa ug passport sa mga suspek kaysa sa mga alegasyon kalabot sa ilang ilegal nga mga kalihokan.
Gipanghimakak ni Teodoro ang pagsulay matod sa China nga gikonekta ang kaso sa mga Pilipino sa China ngadto sa mga operasyon sa Philippine law enforcement. Gitawag niya ang pinakabag-ong pahayag sa Chinese Foreign Ministry batok kaniya nga usa ka “classic squid tactic,” o paggamit og disinformation aron likayan ang pangunang isyu.
