Misaka na sa 22 ka tawo ang namatay tungod sa hiniusang epekto sa bagyong Luis, Maymay ug habagat, base sa datos nga gipagawas sa National Disaster Risk Reduction and Management Council (NDRRMC) karong Sabado, Agosto 15.
Nakapagtala ang Benguet sa pinakadaghang ihap sa mga namatay nga mikabat sa 15, lakip na ang 10 nga namatay tungod sa landslide sa Baguio City.
Gikumpirma usab sa konseho ang mga namatay sa La Union, Rizal ug Batangas.
Samtang, padayon pa ang pagpangita sa tulo ka gikataho nga missing, lakip ang usa gikan sa Alaminos City sa Pangasinan, usa gikan sa Batangas City ug usa gikan sa Candelaria sa Quezon Province.
Naapektuhan usab sa tulo ka weather systems ang kapin 4.8 milyon ka tawo, diin anaa sa 14,600 ka pamilya ang nagpabilin sa mga evacuation center.
Nadaot usab ang kapin 1,800 ka mga balay tungod sa dautang panahon, diin adunay mga partially damaged ug totally damaged.
Samtang, miabot na sa P3.3 bilyon ang gibanabanang kadaot sa imprastraktura ug P689.7 milyon sa sektor sa agrikultura, diin ang humay maoy commodity nga pinakagrabeng naapektuhan.
