Gipadayag ni Senator Panfilo “Ping” Lacson nga nakamatikod sila og pipila ka kwestiyonableng lump sum appropriations alang sa mga infrastructure projects sa gisugyot nga P7.2-trilyon nga national budget alang sa 2027.
Matud ni Lacson, pangayuan nila og detalyadong impormasyon ug katin-awan ang maong mga pondo, nga mahimo usab hisgutan atol sa Development Budget Coordination Committee o DBCC briefing sa Agosto 27.
Gipasabot sa senador nga ang lump sum appropriation mao ang kinatibuk-ang pondo nga gigahin alang sa usa ka proyekto o programa nga walay detalyadong pagkabahin-bahin sa mga gasto.
Sumala kaniya, mahimong dawaton ang lump sum alang sa calamity funds tungod sa panginahanglan nga adunay pondo nga dali magamit panahon sa kalamidad. Apan, mahimong kwestiyonable kini kung gamiton alang sa mga infrastructure projects.
Gipahibalo usab ni Lacson nga susihon nila pag-ayo ang proposed budget aron matino kung adunay mga special provisions nga posibleng magamit sa pag-abuso sa unprogrammed appropriations.
Samtang, gipasalig ni Senate Finance Committee Chairman JV Ejercito nga dili niya tugotan ang bisan unsang budget insertion atol sa bicameral conference committee kung wala kini gilakip sa budget version nga giaprobahan sa Senado o sa House of Representatives.
Gipasiugda sa mga senador nga kinahanglan masiguro ang transparency ug hustong paggamit sa pondo sa katawhan samtang gisusi ang proposed P7.2-trilyon nga national budget alang sa 2027.
