Hugot nga gikondenar sa Japan ang pagbisita ni Presidente Vladimir Putin sa Russia sa usa ka gikuwestiyon nga isla duol sa teritoryo niini.
Mibisita si Putin sa Iturup, nga gitawag usab og Etorofu sa Japan, usa sa upat ka isla sa Kuril chain nga giangkon sa Tokyo apan kontrolado sa Russia.
Matud ni Japanese Prime Minister Sanae Takaichi, dili madawat ang pagbisita ni Putin tungod kay makapasakit kini sa mga Hapon.
Gipatawag usab dayon sa Japanese Foreign Ministry ang Russian ambassador sa Tokyo aron ipasaka ang pormal nga protesta.
Samtang, giinsistir sa Russian Embassy nga kabahin sa teritoryo sa Russia ang maong mga isla ug legal ang ilang pagkasakop niini.
Ang upat ka isla gisakop sa Soviet Union pipila ka adlaw human misurender ang Japan sa panahon sa World War II.
Hangtod karon, padayon gihapon kini nga giangkon sa Japan ug nahimong usa sa mga hinungdan nganong wala pa’y pormal nga peace treaty tali sa duha ka nasod.
Misamot usab kabugnaw ang relasyon sa Moscow ug Tokyo human sa pagsulong sa Russia sa Ukraine niadtong 2022, diin miapil ang Japan sa mga nasod nga nagpahamtang og sanctions batok sa Russia.
