GENSAN-Gipasabot sa Department of Education Region XII nga mas sayon dumalahon ang mga kindergarten ug gagmay’ng grado panahon sa linog kon itandi sa mga tinun-an nga teenager.
Sumala kang Mervie Seblos, Assistant Schools Division Superintendent sa DepEd Region XII, ilang gipatuman ang mga lakang nga mas maampingon ug proactive aron maandam ang mga eskwelahan sa posibleng mahitabo panahon sa linog o uban pang kalamidad.
Matud niya, ilang prinsipyo nga kinahanglan “OA” o sobra kaandam ang DepEd aron ma-anticipate ang posibleng mga sitwasyon ug malikayan ang mas dakong peligro.
Matud ni Seblos, base sa ilang obserbasyon panahon sa linog, labing sayon dumalahon ang mga kindergarten, gisundan sa mga magtutudlo, ug dayon ang mga gagmay’ng grado sama sa Grade 1, Grade 2 ug Grade 3.
Samtang mas dako ang hagit sa pagdumala sa mga tinun-an nga teenager tungod kay mas independent na sila sa paghunahuna ug usahay adunay kaugalingong desisyon kung unsaon pagpanalipod sa ilang kaugalingon panahon sa linog.
Apan alang sa mga kindergarten ug gagmay’ng bata, matud ni Seblos, ang ilang kasagarang sundon mao ang instruksyon sa ilang mga magtutudlo, busa mas sayon silang magiyahan sa panahon sa emerhensiya.
Dugang pa sa opisyal ang importansya sa pagka-proactive ug pagtan-aw daan sa mga posibleng peligro aron masiguro ang kaluwasan sa mga estudyante ug personnel sa mga eskwelahan.
