Halos midoble ang kadaot sa sektor sa agrikultura tungod sa hiniusang epekto sa mga bagyong Luis ug Maymay, lakip ang gipalig-on nga habagat.
Sa pinakabag-ong datos gikan sa Department of Agriculture, misaka na sa P689.66 milyon ang kantidad sa kadaot nga naangkon sa sektor sa agrikultura tungod sa mga kalamidad sa nasod.
Mas taas kini kumpara sa P347.37 milyon nga gitaho sa ahensya miaging adlaw.
Tungod niini, naapektuhan ang 21,115 ka mga mag-uuma sa Ilocos Region, Cagayan Valley, Central Luzon, Calabarzon, Mimaropa ug Western Visayas.
Kini human madaot sa mga bagyo ang kapin 17,000 metriko toneladang farm produce ug kapin 19,000 ektarya nga umahan.
Pangunang naapektuhang commodities ang bugas, gisundan sa mais, saging, high-value crops, livestock ug poultry, agricultural infrastructures, ingon man ang mga makinarya ug kagamitan.
Gilauman usab nga mosaka pa ang kantidad sa kadaot samtang nagpadayon ang damage assessment ug validation sa mga apektadong rehiyon.
