Naglunsad ang North Korea og ballistic missile sa wala pa ang tinuig nga hiniusang ehersisyo militar uban sa Estados Unidos ug South Korea nga gitawag og Ulchi Freedom Shield, nga molungtad og 11 ka adlaw gikan sa Lunes, Agosto 17 hangtod 27.
Kini na ang ikaduhang ballistic missile test sa maong nasod sulod lamang sa usa ka semana, nga nakita isip protesta batok sa military drills nga ilang giisip nga pagpangandam alang sa pagsulong o invasion.
Sumala sa Joint Chiefs of Staff sa South Korea, gipabuto ang ballistic missile gikan sa eastern coastal Wonsan Area padulong sa East Sea, nga nailhan usab nga Sea of Japan, alas-6:00 sa buntag karong Miyerkules. Milupad kini og kapin 700 kilometros.
Andam usab ang South Korea nga makigtambayayong sa Estados Unidos aron mapugngan ang bisan unsang posibleng probokasyon gikan sa North Korea.
Samtang, gihangyo sa Presidential National Security Council sa Seoul ang Pyongyang nga undangan ang paglunsad og ballistic missiles, nga ilang gitawag nga usa ka buhat sa probokasyon ug paglapas sa mga resolusyon sa United Nations Security Council.
