Misaka na sa kapin 200 ang ihap sa mga namatay tungod sa magnitude 7.4 nga linog sa Colombia samtang nagpadayon ang halapad nga rescue operations sa nasud.
Matud sa United Nations humanitarian office OCHA, labing menos 126 ang kumpirmadong namatay ug 1,495 ang nasamdan base sa opisyal nga datos niadtong Lunes sa gabii. Apan, gibanabana sa lokal nga mga awtoridad niadtong Martes nga misaka na sa 224 ang ihap sa mga namatay.
Sa mga lugar nga labing grabeng naapektuhan, tibuok gabii nga nagtrabaho ang mga rescue team gamit ang mga crane ug excavator sa pagpangita ug pagluwas sa mga biktima.
Hapit 5,000 ka balay ang nadaot, samtang pipila ka mga building ang hingpit nga nahugno ug gatusan ka mga panimalay ang naguba.
Lakip sa grabeng naapektuhan ang Cali ug Pereira, diin daghang residential buildings ang nahugno.
Sa usa ka ospital sa Cali, nahugno usab ang pipila ka andana, lakip ang mga bahin sa pediatric care area, hinungdan nga gibalhin sa kadalanan ang gatusan ka mga pasyente.
Unom usab ka mga airport ang temporaryong gisirhan tungod sa linog, samtang pipila ka mga dalan ang dili maagian.
Naputol usab ang kuryente, suplay sa tubig, komunikasyon ug health services sa pipila ka lugar, ilabina sa Chocó nga duol sa epicenter sa linog.
Nagpadala na og ayuda ang nagkadaiyang humanitarian agencies, lakip ang pagkaon, limpyo nga tubig, hygiene kits, medical supplies ug mga kagamitan alang sa evacuation.
Samtang, giingon sa Estados Unidos nga naggahin kini og 15.5 million dollars alang sa emergency shelter, pagkaon, proteksyon ug damage assessment.
Naggahin usab ang Inter-American Development Bank og 50 million dollar nga mahimong gamiton alang sa reconstruction kung mangayo og tabang ang Colombia.
