GENSAN- Gipasalig sa Department of Education (DepEd) nga walay estudyanteng mabiyaan bisan pa sa mga kausaban ug pag-adjust sa curriculum.
Sumala kang Mervie Y. Seblos,Assistant School Division Superintendent sa DepEd Region XII usa sa ilang gipunting ang “easing of the curriculum” aron dili sobra ang pressure sa mga learners ug teachers sa paggukod sa mga leksyon.
Matud niya, adunay flexibility sa curriculum nga nagtugot sa mga eskwelahan sa pag-adjust sa sequence sa mga leksyon base sa kahimtang ug panginahanglan sa mga estudyante.
Lakip sa mga lakang ang paglikay sa assignments panahon sa weekends ug pagdumala sa mga buluhaton aron dili magdungan-dungan og daghan ang assignments sa mga estudyante sa usa ka adlaw.
Gipahibalo usab sa DepEd nga ang mga performance task sa mga estudyante, kung mahimo, kinahanglan himuon sulod sa school hours aron malikayan ang sobra nga oras sa gawas sa eskwelahan ug posibleng mga risgo sa ilang kaluwasan.
Sumala ni Seblos, kabahin kini sa mga intervention sa DepEd aron ma-decongest ang curriculum ug lesson plans, samtang mapadayon ang kalidad sa pagkat-on sa mga estudyante.
