Gipadayag sa ika-14 nga impeachment trial ni Vice President Sara Duterte ang listahan sa mga aktibidad nga giingong gigastusan gamit ang confidential funds sa Office of the Vice President o OVP niadtong Disyembre 2022.
Sa pagbalik sa witness stand karong Martes, Agosto 11, mitestigo si Xylene Mae Del Ocampo, supervising auditor sa COA-Intelligence and Confidential Funds Audit Office o COA-ICFAO.
Matod ni Del Ocampo, lakip sa mga gigastusan sa gikuwestiyon nga pondo sa OVP ang mosunod:
- Disyembre 13 – Partners Appreciation Night sa Mandaluyong City;
- Disyembre 15 – Knights of Rizal Supreme Council – 60th Year of the Institute sa Baguio City ug Youth Campaign on Patriotism;
- Disyembre 17 – Christmas Activity sa Happyland, Tondo, Manila;
- Christmas Activity ug Exploration Meeting sa Extension Office sa Barangay 101, Tondo, Manila;
- Pasasalamat ug Update Meeting sa TODA sa Barangay Batasan Hills, Quezon City;
- Pasasalamat ug Consultation Meeting uban sa TNVS Angkas ug food delivery riders sa Quezon City; ug
- Pasasalamat ug Update Meeting uban sa PWD Sector sa Quezon City.
Lakip usab sa mga nakalista sa mga dokumento ang tree-planting activities, pagpanghatag og wheelchair ug medical missions.
Nabutyag sa pagdungog nga gipahigayon ang maong mga aktibidad gikan Disyembre 13 hangtod 31, 2022, una pa giluwatan o nadawat ang cash advance niadtong Disyembre 21 alang sa maong confidential funds.
Giingong supak kini sa lagda sa COA alang sa paggamit sa confidential funds.
Misugot si Del Ocampo sa dihang gipangutana ni Presiding Officer Francis Escudero kung ang pondo nga gipagawas sugod Disyembre 21 dili mahimong gamiton aron i-reimburse ang mga gasto nga nahimo na sa wala pa ang maong petsa.
Gipasabot pa sa testigo nga gidili sa joint circular ang paggamit sa confidential funds aron i-reimburse ang mga gasto nga nahimo na.
Si Del Ocampo maoy mipuli sa pag-audit sa confidential funds sa OVP ug Department of Education ubos sa administrasyon ni Duterte human gibalhin sa ilang branch si kanhing COA state auditor Roderick Wamil niadtong Pebrero 2024.
Matod ni Del Ocampo sa Senate Impeachment Court, nagsumite ang OVP og tubag sa COA niadtong Marso 13, 2024 human kini mahatagan og notice of suspension kalabot sa ilang confidential fund.
Sa maong tubag, gilakip sa OVP ang mga dokumentong nagsuporta sa 105 ka aktibidad sa ilang opisina gikan Disyembre 13 hangtod 31, 2022. Gigamit kini aron suportahan ang ilang paggasto gikan sa cash advance niadtong Disyembre 21 hangtod 31, 2022, nga giingong gigamit sa pagbayad sa mga impormante alang sa information gathering ug surveillance activities.
