Kapin usa ka milyon ka tawo ang gipabakwit sa sidlakang bahin sa China tungod sa kusog nga bagyong Dolphin nga nagdala og kusog nga hangin, grabeng ulan ug pagbaha.
Mi-landfall ang bagyo sa Yuhuan sa Zhejiang province niadtong Domingo sa alas 5:30 sa hapon, nga adunay kusog nga hangin nga moabot sa 150 kilometros matag oras.
Naigo usab sa bagyo ang Shanghai, diin gibana-bana nga 40 porsyento sa mga flights ang nakanselar niadtong Lunes tungod sa dili maayong panahon.
Sa Zhejiang, kapin 900,000 ka residente sa Wenzhou ang gipabalhin ngadto sa mas luwas nga lugar, samtang kapin 30,300 ka tawo sa Shanghai ang gipaebakwit. Dugang 390,000 ka residente sa Taizhou ug hapit 98,900 sa Fujian ang gipabalhin usab.
Gipasidan-an sa mga awtoridad ang publiko batok sa posibleng grabeng pagbaha ug landslide samtang nagpadayon ang kusog nga pag-ulan.
Gikanselar usab ang kapin 1,400 ka flights gikan sa Shanghai, samtang gisuspenso ang mga biyahe sa mga ferry ug gipabalik sa pantalan ang mga barko isip pagpangandam sa epekto sa bagyo.
Human sa pag-landfall, mihuyang na ang Dolphin ngadto sa ubos sa lebel sa bagyo apan gilauman nga magpadayon ang kusog nga ulan samtang kini molihok paingon sa sentral ug habagatang bahin sa China.
