Walay paspas nga solusyon sa grabeng pagbaha nga nasinati sa pipila ka bahin sa Luzon tungod sa walay hunong nga pag-ulan nga dala sa Habagat.
Mao kini ang giingon ni Department of Public Works and Highways (DPWH) Secretary Vince Dizon, human sa halapad nga pagbaha sa pipila ka lugar sa Metro Manila ug ubang bahin sa Luzon.
Sumala ni Dizon, ang problema dili masulbad sulod lang sa usa ka tuig. Kinahanglan ang usa ka dugay nga solusyon ug hustong pagpatuman sa mga proyekto sa tibuok nasud.
Padayon usab ang imbestigasyon sa Office of the Ombudsman kabahin sa mga kuwestiyonableng flood control projects.
Matod sa Kalihim, samtang gihulat ang resulta sa imbestigasyon, nakatutok ang DPWH sa pag-ayo sa mga guba, wala mahuman ug gibiyaan nga mga proyekto nga unta makatabang na sa pagkontrolar sa pagbaha.
Samtang, pipila ka residente ang kinahanglang luwason human misaka pag-ayo ang tubig-baha sa Barangay San Isidro, Parañaque City.
Migamit ang mga residente og pisi isip giya samtang mitabok sa lawom nga baha. Sa ulahi, miabot ang mga rescuer nga nagdala og mga rescue boat.
Sa Sucat, Parañaque, halos wala na makalihok ang trapiko tungod sa grabeng pagbaha. Dili usab maagian sa mga sakyanan ang pipila ka bahin sa Zapote Junction ilawom sa Zapote Flyover.
Sa Quezon City, kapin 600 ka residente gikan sa Roxas District ug Barangay Bagong Silang ang mibakwit tungod sa pagsaka sa tubig-baha.
Miabot hangtod sa dughan ang baha sa pipila ka bahin sa Gumamela ug Waling-Waling Streets sa Roxas District.
Matod sa mga lokal nga opisyal, unang gibakwit ang mga bata, senior citizen ug persons with disabilities isip pag-amping.
Sa Roxas Gymnasium, 19 ka pamilya o kapin 70 ka indibidwal ang temporaryong mipuyo sa evacuation center.
Samtang, dili moubos sa 149 ka pamilya gikan sa Barangay Bagong Silang ang gikatahong mibakwit usab.
