Gikumpirma sa Iran-aligned Houthi group sa Yemen nga ilang giatake ang Jazan refinery sa Saudi Aramco kagahapong Domingo, pipila ka adlaw human mipirma ang Saudi Arabia og defense pact uban sa Turkey ug Pakistan.
Sumala kang Houthi military spokesperson Yahya Saree, migamit sila og drone aron targeton ang refinery sa Jazan, sa habagatang-kasadpang bahin sa Saudi Arabia.
Samtang, sumala sa Saudi Energy Ministry, nasunog ang refinery apan gilayon kining napalong. Wala usab nay gikatahong nasamdan sa maong insidente.
Ang Jazan refinery adunay kapasidad nga makaproseso og hangtod 400,000 ka bariles sa crude oil kada adlaw ug kaniadto na usab nahimong target sa mga pag-atake sa maong rebeldeng grupo.
Gawas sa Saudi Arabia, miingon usab ang Houthis nga nagpahigayon sila og missile ug drone attacks batok sa Mocha, usa ka Yemeni Red Sea port city.
Sumala sa gikataho, gipusil sa air defenses ang mga drone nga giingong nag-target sa commercial quay ug storage facilities sa pantalan.
Matud ni Saree, target nila ang mga sundalong Saudi ug weapons arsenal sa maong lugar.
Sumala usab sa Yemeni military spokesperson, pito ka tawo ang namatay sa pag-atake.
Giingon sa Yemeni Transportation Ministry nga grabeng nadaot ang imprastraktura sa pantalan.
Una nang nagdeklara ang Houthis og naval blockade batok sa Saudi Arabia sa Red Sea, nga ilang gikonekta sa giingong blockade sa Riyadh batok kanila, nga gilimod usab sa Saudi government.
Duha ka adlaw sa wala pa ang insidente, mipirma ang Saudi Arabia og defense agreement uban sa Turkey ug Pakistan isip tubag sa nagkagrabeng regional instability tungod sa gubat tali sa US, Israel ug Iran.
Nakasulat sa maong kasabutan nga ang armadong pag-atake batok sa bisan asa sa tulo ka mga nasud isipon nga pag-atake batok kanilang tanan.
Wala pa klaro kung moapil ba o unsaon pagtubag sa Turkey ug Pakistan kung mohimo og lakang ang Saudi Arabia batok sa mga bag-ong pag-atake sa Houthis.
Samtang, miingon si Turkish Foreign Minister Hakan Fidan nga wala nakatutok ang defense pact batok sa Iran o sa bisan unsang partikular nga nasud. Matud niya, usa kini ka kinatibuk-ang kasabutan alang sa pagtinabangay sa seguridad sa tulo ka mga nasud nga magkaalyado.
