Temporaryong gisuspindi sa Department of Agriculture (DA) ang pag-import sa Pilipinas sa mga buhing hayop ug pipila ka animal products gikan sa pito ka nasud sa Middle East ug Europe tungod sa mga natalang outbreak sa foot-and-mouth disease o FMD.
Ubos sa Department Circular No. 39, temporaryong gidili ang pagsulod sa nasud sa mga buhing baboy, baka, carabao ug uban pang mga hayop nga daling matakdan sa FMD, lakip ang preskong karne, casings, tallow, hooves, horns ug animal semen gikan sa Azerbaijan, Bahrain, Cyprus, Iraq, Israel, Kuwait ug Palestine.
Matud ni Agriculture Secretary Francisco Tiu Laurel Jr., importante ang maong lakang aron mapanalipdan ang livestock sector, panginabuhian sa mga mag-uuma ug food security sa nasud.
Matud sa DA, gipatuman ang suspension human gikumpirma sa Food and Agriculture Organization sa United Nations ang mga outbreak sa FMD virus serotype SAT1 sa mga apektadong lugar.
Gipadayag sa kalihim nga ang lakang sa gobyerno gibase sa siyensya ug gihimo isip precautionary measure, samtang padayon gihapong gitugotan ang luwas nga pagbaligya sa mga produkto nga nakasunod sa veterinary ug import requirements.
Lakip sa mga produkto nga mahimo gihapong ma-import sa Pilipinas mao ang mga giila sa World Organisation for Animal Health nga “safe commodities,” sama sa UHT milk ug dairy products, heat-treated canned meat, protein meal, gelatin, ug pipila ka processed hides ug leather products.
