Nalangan matod pa ang imbestigasyon sa Philippine Reclamation Authority o PRA kalabot sa reclamation activities sa usa ka bahin sa Taguig City human matod pa gi-pressure ni kanhi Senate President Alan Peter Cayetano ang mga opisyal sa ahensya atol sa budget deliberations sa Office of the President niadtong Nobyembre 2025.
Sumala kang Senator Panfilo “Ping” Lacson, base sa impormasyon nga iyang nakuha gikan sa mga opisyal sa PRA, gipatawag ni Cayetano ang mga representante sa ahensya ngadto sa iyang opisina ug gihulga nga ipahunong ang deliberasyon sa budget sa Office of the President.
Matud ni Lacson, nahimong hinungdan kini sa pressure nga gibati sa mga opisyal sa PRA ug sa pagkalangan sa ilang imbestigasyon sa reclamation project sa Taguig.
Subay niini, gibutyag sa senador nga magpahigayon pag-usab og imbestigasyon ang PRA sa ektaryang luna diin gitukod ang giingong ilegal nga reclamation.
Gikumpirma usab matod pa sa PRA nga wala makakuha og reclamation permit ang Taguig City government alang sa maong proyekto.
Sumala kang Lacson, kung gihimo ang reclamation nga walay permit gikan sa PRA, nga maoy ahensyang adunay mandato sa pag-regulate sa reclamation ug pag-isyu sa gikinahanglang permit, ang lohikal nga lakang mao ang forfeiture o pagpabalik sa reclaimed land ngadto sa national government.
Samtang, giingon ni Lacson nga anaa na sa Ombudsman ang mga dokumentong ilang natigom kalabot sa mga giingong anomalya sa flood control projects sa Taguig, lakip na ang mga case study ug affidavits sa mga testigo.
Dili na usab niya ipugos ang pagpadayon sa hearing sa Blue Ribbon Committee ug itugyan na sa chairman niini nga si Senator Erwin Tulfo kung ipatawag pa ba sa public hearing ang mga isyu nga may kalabotan sa Taguig.
Bisan pa niini, giingon ni Lacson nga importante nga maimbestigahan ang mga alegasyon tungod kay padayon gihapong nakasinati og pagbaha ang mga residente bisan pa sa bilyon-bilyong pisong gigahin alang sa flood control projects.
Sa pagkakaron, gisulayan pa sa Bombo Radyo Philippines nga makuha ang reaksyon ug opisyal nga pahayag ni Cayetano kalabot sa maong mga alegasyon
