Daling mihimo og aksyon sila Public Works Secretary Vince Dizon ug Parañaque 2nd District Representative Brian Yamsuan aron masulbad ang grabeng pagbaha sa Fourth Estate, Parañaque.
Personal nga mitambong sila Dizon ug Yamsuan sa maong lugar ning Domingo, Agosto 9, human malubog sa tubig nga moabot hangtod hawak ang komunidad tungod sa kusog nga ulan niadtong Sabado sa gabii.
Sumala kang Dizon, magpadala dayon ang Department of Public Works and Highways o DPWH og water pump aron paspas nga mabawasan ug mapahawa ang tubig baha.
Magpadala usab kini og backhoe aron limpyohan ang mga agianan sa tubig nga nababagan sa mga basura.
Gihisgutan usab nila ang mga dugayng solusyon aron malikayan ang balik-balik nga pagbaha sa Fourth Estate ug uban pang flood-prone areas sa Parañaque.
Nagpasalamat si Yamsuan kang Dizon sa paspas nga aksyon ug gihangyo ang mga residente nga motabang pinaagi sa hustong paglabay sa basura ug dili kini ilabay sa mga creek ug waterways.
Kung mahinumduman, niadtong Mayo 18, nagpahigayon usab og inspeksyon sila Dizon ug Yamsuan sa mga lugar nga kanunay gibahaan sa Parañaque.
Lakip niini ang Villanueva Creek, nga gilimpyohan gamit ang amphibious excavator aron makatabang sa pagkunhod sa pagbaha sa Dr. Santos Avenue.
Plano usab sa DPWH ang pagtukod og flood interceptor project sa Dr. Santos Avenue, samtang gitun-an ang pag-upgrade sa mga karaang dike ug pagtukod og detention ilalom sa pipila ka basketball court ug open spaces.
