Giinsistir ni Senator Christopher “Bong” Go nga ang mga trabaante nga Pilipino mismo ang angay makabati sa pag-uswag sa ekonomiya sa nasod human opisyal nga giila sa World Bank ang Pilipinas isip usa ka upper-middle-income country.
Matud ni Go, ironic nga bisan giila sa World Bank ang pag-uswag sa ekonomiya sa nasod, sobra sa katunga sa mga pamilyang Pilipino o kapin 14.5 milyon ka pamilya ang gikonsiderar gihapon nga kabos base sa mga pagtuon nga gihimo.
Tungod niini, giinsistir sa senador nga ang maong pag-ila kinahanglan moresulta sa pag-abli og mas daghang trabaho ug patas ug igo nga sweldo aron matubag sa mga pamilyang Pilipino ang ilang inadlaw-adlaw nga panginahanglan.
Gipadayag usab niya ang kasamtangang kalisod nga giatubang sa mga minimum wage earner tungod sa pagsaka sa presyo sa mga palaliton, ilabina sa epekto sa pagtaas sa presyo sa mga produktong petrolyo.
May kalabotan niini, gikondena pag-usab ni Go ang Temporary Restraining Order nga gipagawas sa Pasig City Regional Trial Court batok sa giaprobahang P85 nga inadlaw nga wage increase alang sa mga trabahante sa Metro Manila.
Nanawagan ang senador sa korte nga ikonsiderar ang Article 126 sa Labor Code, diin giingon nga walay korte, tribunal o bisan unsang ahensya ang mahimong magpagawas og TRO batok sa proseso sa National Wages and Productivity Commission o NWPC ug Regional Tripartite Wages and Productivity Boards o RTWPB.
Gipunting usab ni Go nga ang P85 nga wage increase mas ubos pa sa iyang gisugyot nga P100 nga wage hike alang sa mga mamumuo sa Pilipinas, dili lamang sa Metro Manila kondili sa tanang rehiyon sa nasod.
Tungod niini, nanawagan ang senador sa Kongreso nga ipasar na ang maong sugyot alang sa dugang nga wage increase sa mga mamumuo.
