Gikoronahan si Angelica Lopez sa Palawan isip bag-ong Reina Filipinas Grand International 2026 atol sa unang grand coronation night sa maong pageant nga gipahigayon niadtong Biyernes.
Si Lopez ang mahimong representante sa Pilipinas sa Miss Grand International 2026, puli kang Emma Mary Tiglao.
Napildi ni Lopez ang 20 ka laing kandidata gikan sa nagkadaiyang bahin sa nasud aron makuha ang prestihiyosong korona.
Gikoronahan usab isip first runner-up si Cleopatra Barrera sa Zambales, samtang second runner-up si Isabella Ortega sa Camarines Sur.
Si Zeah Nestle Pala sa Mandaluyong ang nakakuha sa third runner-up, samtang si Luisa Benavides sa Caloocan ang fourth runner-up.
Samtang, napili usab sila Anne Patricia Diaz sa Maynila ug Alexie Caimoso Brooks sa Iloilo City isip mga representante sa Pilipinas sa sunod nga edisyon sa MGI All Stars, human makuha ang Reina Filipinas MGI All Stars titles.
Ang mga mananaog gipili base sa kombinasyon sa puntos gikan sa panel of judges ug boto sa publiko. Lakip sa mga hurado ang internationally acclaimed Filipino designer nga si Michael Cinco, Miss Grand International 2024 nga si CJ Opiaza, inaugural MGI All Stars winner nga si Vanessa Pulgarin sa Colombia, ug first runner-up sa MGI All Stars nga si Nguyen Huong Giang sa Vietnam.
