Misaka sa 4.9 porsyento ang unemployment rate o gidaghanon sa mga walay trabaho sa Pilipinas niadtong Hunyo, gikan sa 4.8 porsyento niadtong Mayo.
Base sa pinakabag-ong datos sa Philippine Statistics Authority o PSA, misaka ngadto sa 2.59 milyon ang mga walay trabaho niadtong Hunyo, kumpara sa 2.5 milyon sa miaging bulan.
Sumala sa PSA, misaka usab ang labor force participation ngadto sa 53.25 milyon, o 65.1 porsyento, gikan sa 52.13 milyon o 63.8 porsyento niadtong Mayo.
Gibanabana nga 650,000 ka Pilipino ang bag-ong misulod sa labor force niadtong Hunyo. Sa maong gidaghanon, 592,000 ang nag-edad og 15 hangtod 24 anyos, kadaghanan kanila mga bag-ong gradwado.
Apan, 310,000 lamang kanila ang nakakita og trabaho, samtang 282,000 ang nagpabiling walay trabaho.
Matud ni Leonardo Lanzona, ekonomista sa Ateneo de Manila University, ang pagsaka sa unemployment rate dili tungod sa pagkahuyang sa panginahanglan sa mga trabahante, kondili tungod sa dakong pagdaghan sa mga nangita og trabaho.
Nagpasabot kini nga daghan ang bag-ong misulod sa labor force, ilabina ang mga bag-ong gradwado, apan wala pa igo ang mga oportunidad sa trabaho aron mahatagan sila tanan og trabaho.
