Posibleng malangan ang dagan sa impeachment trial ni Vice President Sara Duterte tungod sa pagbalibad sa depensa nga i-stipulate o ilhon ang pipila ka dokumento, sumala kang House prosecution spokesperson Atty. Benjamin Tolosa.
Una nang misupak ang depensa sa pag-uyon sa pipila ka dokumento nga gamiton sa pagdungog sa Senate Impeachment Court sa Lunes, Agosto 10.
Matud ni Tolosa, balik-balik na kuno nga nakig-coordinasyon ang prosecution team sa depensa aron ikumpara ang ilang documentary exhibits sa wala pa ang hearing. Tumong niini nga malikayan ang taas nga proseso sa pag-matuod sa mga dokumento atol sa hearing.
Apan imbes nga himuon kini sa wala pa ang hearing, gi-rekomendar kuno sa depensa nga sa Agosto 14 pa i-review ang mga dokumento, pipila ka adlaw human sa sunod nga pagdungog.
Kung dili matuman ang pagkumpara sa mga dokumento sa wala pa ang hearing sa Lunes, matud ni Tolosa nga mapugos ang prosecution nga isa-isahon og pagmatud-an ang mga dokumento sa open court, nga posibleng makapalangan sa pagproseso.
Gipasabot usab ni Tolosa nga ang tumong mao ang pagpadali sa proseso pinaagi sa pag-uyon sa mga dokumento nga pareho ra anaa sa kamot sa duha ka kampo.
Lakip sa mga ebidensyang dili gustong ilhon sa depensa ang kapin 4,000 ka dokumento, lakip ang mga 800 acknowledgment receipts nga may kalabotan sa P125 milyon nga confidential funds sa Office of the Vice President ug Department of Education.
