Posibleng makasinati og dako nga pagkunhod sa presyo sa mga produktong petrolyo ang mga motorista sa sunod semana, human sa paghupay sa tensyon sa Middle East ug pagpalig-on sa piso batok sa dolyar.
Base sa lihok sa Mean of Platts Singapore (MOPS) ug sa average foreign exchange rate sa milabay nga upat ka adlaw, matud sa usa ka industry source sa lana nga mahimong mokunhod og P4.50 hangtod P5.00 kada litro ang presyo sa diesel, samtang P4.50 hangtod P5.00 kada litro usab ang posibleng ibawas sa presyo sa gasolina.
Matud sa maong source, mikunhod ang presyo sa lana sa international market tungod sa bag-ong paglaom nga masulbad pinaagi sa diplomasya ang panagbangi tali sa Estados Unidos ug Iran. Tungod niini, mikunhod usab ang geopolitical risk premium sa merkado.
Dugang pa niini, dako usab ang pag-ubos sa presyo sa diesel ug gasolina sa Asian market, dungan sa pagkunhod sa presyo sa krudo ug paghupay sa kabalaka bahin sa posibleng pagkalangan sa suplay sa lana.
Nakatabang usab, matud pa, ang pagpalig-on sa piso batok sa dolyar karong semanaha aron mas moubos pa ang gilauman nga presyo sa mga produktong petrolyo sa nasud.
Kasagarang magpahibalo ang mga kompanya sa lana sa ilang price adjustment matag Lunes, ug ipatuman kini sugod Martes.
