GENSAN- Gipahibalo ni Gensan City Administrator Shandee Llido Pestaño, nga ang pagpadayon sa face-to-face classes sa mga eskwelahan magdepende sa resulta sa inspeksyon sa ilang mga building human sa sunod-sunod nga aftershocks.
Sumala pa niya kasagarang gihatagan og panahon ang mga establisemento ug institusyon nga ipasusi una ang ilang mga estruktura human sa kusog nga linog.
Matud ni Pestaño, kung ma-certify sa mga engineer nga luwas ug lig-on pa ang mga building sa mga pampubliko ug pribadong eskwelahan, mahimo na silang mopadayon sa face-to-face o blended learning modality.
Gipasabot ni Pestaño nga ang memorandum nga gipagawas ni Mayor para sa pagsuspinde sa klase kay para lamang sa miaging adlaw ug karong adlawa.
Busa, sugod ugma, ang desisyon sa pagbalik sa face-to-face classes ibase na sa resulta sa assessment sa mga engineer ug sa desisyon sa matag administrasyon sa eskwelahan.
Apan, posible gihapon nga mapadayon ang pagsuspinde kung adunay bag-ong direktiba gikan sa City Mayor depende sa kahimtang sa mga aftershocks ug lihok sa yuta.
