Nakurat ang mga organizer sa National Bank Open sa Canada sa paspas nga pagkahurot sa mga tiket para sa mga dula sa Pinay tennis star nga si Alex Eala.
Sumala ni Karl Hale, tournament director sa WTA 1000 event, wala nila damha ang kadaghan sa mga Pilipinong fans nga misuporta sa dula ni Eala batok sa American player nga si Alycia Parks niadtong Huwebes, Agosto 6.
Sa maong dula, gidaog ni Eala si Parks sa iskor nga 6-1, 4-6, 6-2 aron makasulod sa third round.
Tungod sa kadaghan sa mga Pinoy supporters, nag-andam ang organizers og “adobo chicken” sa food court sa Sobey’s Stadium nga adunay seating capacity nga 10,077 ka tawo.
Matud ni Hale, mao kini ang unang higayon nga nagdugang sila og espesyal nga pagkaon tunga-tunga sa torneyo tungod lamang sa usa ka magdudula.
Giisip sa mga organizer nga pamatuod ang kusog nga suporta kang Eala sa kalig-on sa komunidad sa mga Pilipino sa Canada.
Ang kalampusan ug pagkapopular ni Eala naghatag og lahi nga kolor sa torneyo, nga karon nailhan dili lamang sa tennis kondili usab sa pagpakita sa kultura sa mga Pilipino.
