Pormal nang nadawat sa Department of Foreign Affairs (DFA) ang hangyo sa Estados Unidos nga ipa-extradite ngadto sa ilang nasud ang religious leader nga si Pastor Apollo Quiboloy.
Matod sa tigpamaba sa DFA nga si Analyn Ratonel, gipasa na sa ahensya ang extradition request ngadto sa Department of Justice (DOJ) alang sa hustong proseso.
Nag-atubang si Quiboloy og mga kaso sa US nga may kalabotan sa sex trafficking ug racketeering.
Niadtong 2021, giakusahan siya sa mga prosecutor sa US nga giingong nanghikayat ug nagpahimulos sa mga babaye ug menor de edad nga nagsilbi isip iyang personal assistants. Lakip umano sa mga biktima ang mga edad 12 hangtod 25 anyos.
Giapil usab si Quiboloy sa listahan sa Most Wanted sa Federal Bureau of Investigation (FBI).
Dinhi sa Pilipinas, nagpabilin siyang nakakulong sa Pasig City Jail human siya nadakpan niadtong 2024. Nag-atubang usab siya og mga kaso sama sa qualified human trafficking ug paglapas sa balaod batok sa pag-abuso ug pagpahimulos sa mga bata.
Gisalikway ni Quiboloy ang mga alegasyon batok kaniya ug mihangyo og not guilty sa mga kasong gi-file batok kaniya.
Samtang, miingon ang DOJ nga wala pa kini makadawat og pormal nga pahibalo gikan sa Estados Unidos. Apan ubos sa extradition agreement tali sa Pilipinas ug US, ang DFA maoy unang modawat sa maong hangyo una kini ipasa sa DOJ alang sa legal nga proseso.
