Lalaki, patay human nahugmakan og yuta sa Maasim, Sarangani

Patay ang usa ka lalaki human kini mahugmakan og yuta samtang nagtrabaho sa atubangan sa San Felipe Central Elementary School sa Barangay Colon, Maasim, Sarangani Province.

Base sa impormasyon nga gipaambit ni Barangay Kagawad Ame Pable Jr., giila ang biktima sa angga nga “Tikong,” usa ka residente sa maong lungsod.

Sumala sa inisyal nga report, nahugno ang yuta diin nagtrabaho ang biktima, hinungdan nga natabonan kini.

Gidali pa kini og dala sa usa ka ospital aron matambalan, apan gideklara kini nga dead on arrival sa attending physician.

Padayon pa ang imbestigasyon sa mga otoridad aron mahibal-an ang hinungdan sa insidente ug kung adunay nalapas nga mga safety protocol sa maong trabahoan.