Andam matod pa nga moatubang si kanhi House Speaker ug Leyte 1st District Rep. Martin Romualdez sa gipahigayong preliminary investigation sa Office of the Ombudsman kabahin sa giingong anomalya sa mga flood control project.
Matud ni Atty. Ade Fajardo, abogado ni Romualdez, tubagon sa kongresista ang tanang alegasyon batok kaniya, apan iyang gipasiugda nga ang iyang gipangayo lamang mao ang patas nga proseso.
Gisulti usab ni Fajardo nga walay plano si Romualdez nga mobiya sa nasud ug padayon gihapon kini sa pagtuman sa iyang katungdanan isip representante sa Unang Distrito sa Leyte.
Dungan niini, gipadayag pag-usab sa kampo ni Romualdez nga walay ebidensya nga nagkonekta sa magbabalaod sa giingong iregularidad sa mga flood control project.
Matud sa abogado, wala’y papel si Romualdez sa paghimo sa 2025 national budget gawas sa pagpirma niini, ug wala usab matod siya’y kalabotan sa implementasyon sa mga flood control project. Iyang giingon nga usa usab kini sa mga nakaplagan sa Independent Commission on Infrastructure.
Gikuwestiyon usab ni Fajardo ang kredibilidad sa 18 ka giingong “maleta boys” nga giingong kanhi mga bodyguard ni kanhi Ako Bicol Party-list Rep. Zaldy Co, nga lakip sa mga testigong posibleng gamiton sa imbestigasyon sa Ombudsman.
Matud niya, dili angay tuohan ang ilang mga pahayag tungod kay ang Department of Justice mismo ang nagsang-at og kaso nga perjury batok kanila, nga iyang giingong nagpakita nga namakak sila ubos sa panumpa.
