GENSAN – Gipahinumdoman sa Public Safety Office sa General Santos City ang tanang motorista ug mga naggamit sa dalan nga sundon ang bag-ong traffic scheme sa General Santos City Underpass alang sa mas luwas ug hapsay nga dagan sa trapiko.
Sumala sa PSO, ang underpass alang lamang sa mga 4-wheeled vihecle, SUV, van, bus ug truck.
Samtang ang mga motorsiklo, motorized tricycle ug uban pang gagmay nga sakyanan idirekta sa parallel bypass o service roads.
Gipasabot sa ahensya nga ang maong pamaagi gihimo aron maminusan ang posibleng disgrasya sulod sa underpass, ilabina tungod sa kalainan sa gipaspason ug lihok sa nagkalain-laing klase sa sakyanan.
Matud pa sa PSO, mas delikado alang sa motorsiklo ug traysikol ang pag-agi sa underpass tungod sa kahimtang sa dalan, diin kinahanglan ang pagpreno sa pagsulod ug pagpasaka sa paspas nga paggawas niini.
Gipahinumdoman usab ang mga drayber nga ang maximum vertical clearance sa underpass mao ang 5.20 metros, busa ang mga sakyanang mas taas pa niini kinahanglan mogamit og laing ruta.
Nanawagan ang Public Safety Office sa pagsabot ug kooperasyon sa publiko samtang nag-adjust ang mga motorista sa bag-ong sistema aron mapadayon ang kaluwasan, kahapsay ug episyenteng paglihok sa trapiko sa siyudad.
