Gipasa ni Senador Francis “Chiz” Escudero ang usa ka sugyot balaodnon nga magdili sa promosyon sa sugal sa mainstream ug digital media aron mapugngan ang walay pugong nga pagsugal ug mapanalipdan ang mga menor de edad batok niini.
Matud sa senador niadtong Biyernes, Hulyo 31, ipatuman sa Senate Bill No. 2347 o ang “Gambling Advertising Prohibition Act” ang nationwide restriction sa mga advertisement nga may kalabotan sa sugal sa telebisyon, radyo, print media, websites, mobile applications, ug social media.
Gipasabot ni Escudero nga panahon na aron ma-regulate ang industriya sa sugal sama sa gihimo sa industriya sa tabako duha ka dekada na ang milabay, diin gipahamtang ang mga restriksyon sa pag-endorso niini ubos sa Tobacco Regulation Act of 2003.
Ubos usab sa maong sugyot balaodnon, bawal ang mga kampanya sa celebrity ug influencer, sponsorship sa sugal sa sports, concerts, ug cultural events, product placements, promotional giveaways, ug branded merchandise nga makadani sa mga indibidwal nga 21 anyos paubos.
Gitugotan lamang ang advertisement sa sugal sulod sa gambling establishments ug sa opisyal nga websites o mobile applications sa mga operator, apan kinahanglan kini nga adunay age-verification aron malimitahan ang access sa mga 21 anyos pataas lamang.
Hatagan usab og usa ka tuig ang mga operator, advertisers, broadcasters, ug online platforms aron tangtangon ang mga gidili nga advertisement.
Ang mga molapas niini mahimong silotan og multa nga moabot sa tunga sa milyon ka pesos, pagkabilanggo hangtod tulo ka tuig, ug pagbawi sa business permit o lisensya.
