Nagpahayag og kalipay si General Santos City Mayor Lorelie G. Pacquiao sa opisyal nga pag-abli sa Mabuhay Underpass, nga gilauman niyang makahatag og dakong kahupayan sa mga motorista ug makatabang sa pagpaayo sa dagan sa trapiko sa dakbayan.
Matud sa alkalde, ang pagkakompleto sa maong proyekto usa ka importante nga lakang aron mapagaan ang kalisod nga dugay nang giatubang sa mga lumulupyo tungod sa grabeng trapiko, ingon man mapalambo ang konektibidad sa nagkalain-laing bahin sa siyudad.
Gipasalamatan usab ni Mayor Pacquiao ang Department of Public Works and Highways (DPWH), ang national government, mga ahensya sa gobyerno, mga indibidwal nga mitampo sa pagkompleto sa proyekto, ug ang mga taxpayers nga maoy nakatampo sa pagpatuman niini.
Sumala pa sa alkalde, ang Mabuhay Underpass usa ka timaan sa padayon nga paglambo sa General Santos City ug usa ka proyekto nga maghatag og mas hapsay ug mas paspas nga biyahe alang sa mga residente ug bisita sa dakbayan.
