Gibutyag ni Atty. Rey Cartojano, usa ka Political Analyst ning syudad, nga daw wala nasabtan ni Rep. Leila De Lima ang iyang papel isip kabahin sa impeachment trial batok kang Vice President Sara Duterte.
Kini human wala siya gipahuman saiyang opening statement atol sa ika-10 nga adlaw sa pagdungog sa kaso sa Bise Presidente ug hingpit nga gipa-undang ni Presiding Judge Senate President Chiz Escudero.
Matud ni Atty. Cartojano, dili angay nga ang mga abogado mismo ang mahimong motestigo sa usa ka kaso tungod kay ang ilang papel mao ang pagpresentar sa mga ebidensya ug pagdumala sa pangutana sa mga saksi.
Gipasabot niya nga gipahinumdoman na si De Lima ni Escudero sa maong limitasyon, apan mipadayon gihapon kini sa iyang pahayag mao nga gipahunong na kini sa presiding judge.
Dugang pa ni Cartojano, importante nga masabtan sa mga miyembro sa prosecution panel ang ilang papel aron malikayan ang kalibog sa proseso sa impeachment trial.
