Gipaklaro sa Civil Defense Region XII – SOCCSKSARGEN nga bisan pa sa pag-abot sa El Niño conditions, dili kini nagpasabot nga ting-init na ang tibuok nasud o wala nay mahitabo nga pag-ulan.
Matod sa DOST-PAGASA, gilauman nga ang kadaghanang bahin sa Mindanao makadawat og 100 hangtod 300 milimetro nga ulan karong Agosto 2026.
Mas dagkong kantidad sa ulan usab ang gipaabot sa pipila ka lugar sama sa Bukidnon, Lanao del Sur, Cotabato, ug Davao del Sur, diin mahimong moabot sa 200 hangtod 300 milimetro ang ulan.
Gipasabot sa PAGASA nga bisan adunay El Niño, magpadayon gihapon ang pag-ulan tungod sa lain-laing weather systems sama sa Southwest Monsoon o Habagat, easterlies, localized thunderstorms, Low Pressure Areas (LPAs), ug tropical cyclones.
Matod pa sa ahensya, ang El Niño nagpasabot lamang nga adunay mas taas nga posibilidad sa pagkunhod sa kasagarang kantidad sa ulan sa usa ka lugar, apan dili kini garantiya nga hingpit nang mawagtang ang pag-ulan.
