Nahimong viral ang usa ka lalaki sa Arkansas, Estados Unidos human siya nakatabang sa usa ka tawo nga naka-wheelchair nga motabok sa usa ka busy nga karsada samtang nagsul-ob og Spider-Man costume.
Sa video nga narekord sa usa ka traffic camera ug pagpaambit sa Jonesboro Police Department, makita ang usa ka lalaki nga naglisod og tabok sa usa ka intersection tungod sa kadaghan sa mga sakyanan. Kalit usab nga migawas gikan sa usa ka sakyanan nga mihunong atol sa red light ang usa ka lalaki nga nagsul-ob og Spider-Man costume ug dali nga gitabangan ang tawo nga makatabok.
Ang lalaki nailhan nga si Christopher Hellenthal, nga nagsul-ob sa costume sa Marvel character tungod kay super hero day sa iyang gitrabahoan sa Ultimate Air Trampoline Park. Matud niya, nakadesisyon siya nga motabang tungod kay naa siya sa Spider-Man costume ug gusto niyang buhaton ang sakto aron malikayan ang posibleng disgrasya.
Matud ni Hellenthal, wala niya damha nga mahimong viral ang maong hitabo hangtod nga gipukaw siya sa iyang inahan ug gisultihan nga naa siya sa Facebook. Daghang reaksyon ug komento ang nadawat sa video nga gipost sa kapolisan.
Gipahayag ni Hellenthal nga hinaot nga ang iyang gibuhat makadasig sa uban nga motabang sa ilang isigkatawo bisan wala sila gitan-aw o ginasunod sa mga tawo.
