Mag-atbang dayon sa unang hugna sa Washington DC Open singles tournament ang Filipina tennis sensation nga si Alexandra “Alex” Eala ug ang reigning Olympic gold medalist sa China nga si Zheng Qinwen, base sa opisyal nga draw nga gipahigayon karung Domingo.
Si Zheng, nga usa sa labing lig-on nga mga magdudula sa women’s tennis, nakadaog na og lima ka titulo sa Women’s Tennis Association (WTA) ug nakaabot sa career-high world ranking nga No. 4 niadtong Hunyo 2024. Nailhan usab siya isip runner-up sa 2024 Australian Open, diin napildi siya ni Aryna Sabalenka sa finals.
Sa iyang labing bag-ong mga torneyo, nakaabot si Zheng sa quarterfinals sa Athens Open, napilde sa unang hugna sa Wimbledon, ug nakaabante sa ikaduhang hugna sa Bad Homburg Open.
Alang kang Eala, ang DC Open mao ang iyang unang torneyo sukad sa iyang makasaysayang kampanya sa Wimbledon diin nakaabot siya sa Round of 16, usa ka dakong kalampusan alang sa 20-anyos nga Filipina. Samtang, dili na modula si Eala sa doubles competition.
Una unta siyang makig-uban sa seven-time Grand Slam champion nga si Venus Williams, apan si Williams moparis na kang Diana Shnaider.
Ang Washington DC Open pagahimoon gikan sa Hulyo 27 hangtod Agosto 2, diin gilauman nga makahatag si Eala og laing lig-on nga performance batok sa usa sa pinakakusgan nga mga magdudula sa kalibutan.
